Rebusfontein kennnismaking

Aangename kennis Christa en Sonel, ek is Woordnoot en ek woon in nommer 13 in Rebusfontein. En nee hoor! Ek is g’n stuk bygelowig nie. Kyk dan net hoe pragtig is my huisie!

Ek woon in my groen huisie saam met my Bengaalse katjie( wat nou al ‘n tiener is met tipiese tienerstreke!) in my groen huis. Ja, ek is groen besot maar dis my kleur waarmee ek die meeste geluk en vrede beleef. Ek doen niks op Rebusfontein nie. Ek eet en drink net alles wat ek van hou en die lekker daarvan is at ek geen gewig aansit nie! Ek neem net deel aan al die lekker uitdagings wat aan ons gegee word. En natuurlik is ek die een wat my soms in die snaakste penaries bevind soos met die langtafel ete toe ek weggeglip het om in my bad te gaan lê en lees en toe op die ou einde die grootste katastrofe veroorsaak het!Lang tafel op Rebusfontein

In die werklike lewe is ek getroud met die Oom, ma van baie en ouma van nog meer. Amper tien van die klein goedjies. Ek werk in ‘n oudiologie praktyk vir die wonderlikste mens, my Baaskind. Ek is ‘n vryskut omroeper op ‘n internet radiostasie Elan Global Radio. My twee programme is ‘n program op Woensdae aande 7h00 waar ek net gedigte en stories voorlees van digters/skrywers waarmee ek vriende op Facebook is. Vrydag aande doen ek ‘n program waar ek virtueel deur SA toer maar meer op ‘n geskiedkundige wyse. Ek skryf so nou en dan ‘n storie of ‘n gedig, maar my muse is in haar oorgangsjare. Baie hormonaal en wispelturig.

Verder droom ek oor reis.Baie en ver en aanmekaar. Dis die iets in my lewe wat nog net nooit tot vervulling kon kom nie. Ek vermoed my voorouers was iets soos gypsey’s want ek het daai rusteloosheid in my om te beweeg. Dalk is dit die rede vir my muse se verdwyning….sy beweeg dalk sonder my!

Julle sal dit geniet hier op Rebusfontein. Dit is die wonderlikste plek om te wees as die lewe nie so lekker is nie. Dis die beste medisyne in die wêreld. Nie eers aaptwak kan mens so laat vergeet van die alledaagse lewe nie.

Laat weet as julle intrek. Ek het heerlike yskoue sjampanje, net reg om ‘n glasie te klink!  Hoop om julle gou te sien!

Woordnoot